दररोज आपल्या आजुबाजूला काही गोड, काही कडू घटना घडतात. ज्याचा परिणाम हा काही काळापर्यत राहतो. मात्र, समाजात घडणाऱ्या काही घटनांचा परिणाम मात्र दीर्घकाळापर्यंत टिकतो. किंबहुना अनेकदा या घटना त्या-त्या वर्षाच्या ऐतिहासिक घटना म्हणून इतिहासातही त्याची नोंद केली जाते. 2024 मधल्या अशाच धक्कादायक घटना.
बदलापूर केस
बदलापूरमध्ये एका खासगी शाळेत क्लीनर म्हणून नोकरीला असणाऱ्या व्यक्तिने चार वर्षाच्या दोन मुलींवर लैगिंक अत्याचार केले. 12-13 ऑगस्ट रोजी घडलेल्या या घटना एका पीडित बालिकेने आपल्या घरी केलेल्या तक्रारीनंतर उघडकीस आल्या. त्यानंतर 16 ऑगस्ट रोजी मुख्य आरोपी अक्षय शिंदे सह शाळा प्रशासनावर पॉक्सो कायद्या अंतर्गत गुन्हा दाखल करण्यात आला. दरम्यान, पोलिस प्रशासनाने तक्रार नोंदवून घेण्यास केलेली दिरंगाई आणि शाळा प्रशासनाने सुरक्षे संदर्भात केलेली हलगर्जी हे दोन मुद्दे मोठ्या प्रमाणावर चर्चेत आले.
या प्रकरणातील सर्व आरोपींना कठोर शिक्षा व्हावी, म्हणून हजारो आंदोलकांनी रेल रोको आंदोलन केलं होतं. या आंदोलनामध्ये पोलिस अधिकाऱ्यांसह 28 आंदोलक जखमी झालेले. 300 जणांवर एफआयआर आणि 40 जणांना अटक करण्यात आली होती.
आरोपी अक्षय शिंदे याला या प्रकरणी अटक केली. त्यानंतर 23 सप्टेंबर रोजी संध्याकाळी तळोजा जेलमधून बदलापूर कोर्टात जात असताना मुंब्रा बायपास रोडवर त्याचं एनकाऊंटर करण्यात आलं. या एनकाऊंटरवरूनही पोलिस प्रशासनावर टीका केली गेली. या संदर्भातही कोर्टाकडून चौकशीचे आदेश देण्यात आले असून त्याप्रकरणी केस सुरू आहे.
आरजीकर मेडिकल कॉलेज केस
संपूर्ण देशाला हादरवणारी ऑगस्ट 2024 मधली ही दुसरी घटना. 9 ऑगस्ट रोजी कोलकत्ता येथेल्या आरजीकर मेडिकल कॉलेजमध्ये 31 वर्षीय ट्रेनी डॉक्टरवर लैंगिक अत्याचार करून तिची हत्या करण्यात आली. ही घटना उघडकीस आल्यावर मोठ्या प्रमाणात अशांतता निर्माण झाली. पीडित डॉक्टर ही सलग 48 तास काम करत होती. थोडा वेळ विश्रांतीसाठी हॉस्पीटलच्या चौथ्या मजल्यावर असलेल्या सेमिनार हॉलमध्ये गेल्यावर तिच्यावर हा प्रसंग बेतला. तिच्या संपूर्ण शरिरावर जखमा आढळून आल्या.
याप्रकरणी त्याच हॉस्पीटलचे डीन संजय रॉय या आरोपीला अटक करण्यात आली. त्याच्यावर लैंगिक अत्याचार आणि हत्येचा गुन्हा दाखल करण्यात आला.
ट्रेनी डॉक्टरने आत्महत्या केल्याचे कारण देत हॉस्पीटल प्रशासनाने हे प्रकरण दाबण्याचा प्रयत्न केला. या प्रकरणी हॉस्पीटलच्या डीनवर निलंबनाची कारवाई करण्याऐवजी केवळ बदली केल्यामुळेही तेथील राज्य सरकारवर बरीच टीका झाली.
या घटनेनंतर कलकत्तामध्ये अनेक दिवस डॉक्टरांनी आणि अन्य आंदोलकांनी शांततापूर्ण मार्गाने आंदोलन करत न्यायाची मागणी केली.
या घटनेतून पुन्हा एकदा डॉक्टराची सुरक्षा, हॉस्पीटलमधील सुविधा, महिला कर्मचाऱ्यांची सुरक्षा हे मुद्दे ऐरणीवर आले होते.
दरम्यान, सध्या हे सीबीआयकडे असून याची सखोल चौकशी सुरू आहे.
पुणे पोर्शे कार अपघात
पुण्यातील येरवाडा येथे घडलेली हिट अँड रन केस. वेदांत अगरवाल या 17 वर्षीय मुलाने 19 मे च्या मध्यरात्री दारू पिऊन गाडी चालवताना अनिष अवधिया आणि अश्विनी कोस्टा या दोन आयटी इंजिनियर्सच्या गाडीला उडवलं. यामध्ये या दोन्ही आयटी इंजिनियर्सचा जागीच मृत्यू झाला.
याप्रकरणी आरोपी वेदांत अगरवाल याचे ब्लड सॅम्पल्स ब्लड टेस्टसाठी सरकारी ससून हॉस्पीटलमध्ये घेऊन जात असताना त्यामध्ये फेरफार केले गेले. आरोपी वेदांत ऐवजी त्यांच्या आईचे ब्लड सॅम्पल्स रिपोर्टसाठी दिले गेले. याप्रकरणी आरोपीचे आई-वडिल, ससून हॉस्पीटलचे डॉक्टर आणि स्टाफ असे एकूण 7 जणांना अटक करण्यात आली.
या घटनेने त्यावेळी अनेक प्रश्न उपस्थित केले. रोड सेफ्टी, अंडर 18 मुलाला गाडी चालवण्याची परवानगी, गाडीला नंबर प्लेट नसणे, श्रीमंताची मुजोरी आणि गरिबांच्या जीवाला किंमत नसणे अशा अनेक मुद्दांवर माध्यमांमध्ये चर्चा झाली. यामध्ये सगळ्यानाच अचंबित केलेला मुद्दा होता तो म्हणजे अल्पवयीन गुन्हेगार असल्याने कोर्टाने या मुलाला शिक्षा म्हणून 300 पानांचा रोड सेफ्टी या विषयावर निबंध लिहायला देणं. या शिक्षेवरून तर कोर्टावरही समाजाने ताशेरे ओढले.
खलिस्तानी नेत्यांच्या हत्येप्रकरणी चर्चेत असलेला भारतीय एजंट विकास यादव
भारताचा रॉ एजंट विकास यादव याने खलिस्तानी नेता गुरपतवंत सिंग पन्नु यांच्या हत्येचा कट रचल्याचा केल्याचा आरोप कॅनडाने केला आहे.
गुरपतवंत सिंग पन्नु हा खलिस्तानी नेता असून तो अमेरिकन नागरिक आहे. 2023 साली भारतीय गुप्तहेर संघटनेत कार्यरत असणाऱ्या विकेश / विकास यादव या एजंटने पन्नु याची हत्या करण्याचा प्रयत्न केला असा आरोप अमेरिका न्याय मंत्रालयाने केला आहे. याप्रकरणात निखिल गुप्ता या नागरिकाचाही समावेश असून तो आधीच पोलिसांच्या ताब्यात असल्याचं पोलिसांनी म्हटलं आहे. हा गुन्हा सिद्ध झाला तर विकास यादव याला अमेरिकन कायद्यानुसार 10 वर्षाची शिक्षा होऊ शकते. विकास यादव हा फरार असून अमेरिकन गुप्तहेर संस्था एफबीआय त्यांचा शोध घेत आहे.
दरम्यान, या आरोपानंतर आंतरराष्ट्रीय पातळीवर हा विषय मोठ्या प्रमाणावर चर्चिला गेला. त्यामुळे भारताच्या गुप्तहेर खात्याकडे संशयाच्या नजरेनं पाहिलं जाऊ लागलं.
विनेश फोगट अनक्वालिफाइट
वजन वाढणं कमी होणं याकडे अलीकडे सगळ्याचंच बारीक लक्ष असतं. किलोमध्ये वजन वाढणं किंवा कमी होणं हा तसा गंभीर विषय आहे. पण 100 ग्रॅम वजन वाढणं आणि त्यामुळे ऑलिंम्पिक कुस्ती स्पर्धेतून बाद होणं हा अगदी कल्पने पलिकडचा विषय आहे.
ही घटना घडली भारताची कुस्तीपटू विनेश फोगट हिच्यासोबत पॅरिस ऑलिंम्पिक स्पर्धेत. विनेश फोगट ही 50 किलो गटातून फायनलला पोहोचली होती. या ऑलिम्पिंकमध्ये भारताला गोल्ड मेडल मिळणारच, विनेश फोगट गोल्डन गर्ल होणार असंच एकूण वातावरण होतं. मात्र, स्पर्धेच्या दिवशी खेळाडूच्या विविध चाचण्या करताना विनेशचं वजन हे 100 ग्रॅम अधिक भरलं आणि तिला चक्क खेळातून बाद केलं गेलं. या घटनेने सगळ्या जगाचंच लक्ष वेधून घेतलं.
ऑलिम्पिंक खेळातले वजनासंदर्भातले नियम, खेळाडूंनी वर्षभर घेतलेल्या मेहनतीला काही न्याय द्यावा का, कमी अवधीत वजन कसं कमी करावं असे सगळे मुद्दे चर्चिले गेले. या सगळ्या मुद्द्यांसोबत विनेश फोगट ही खेळाच्या राजकारणातली बळी ठरली असा नॅरेटिव्ह विरोधकांनी सुरू केला. कुस्ती महासंघाचे अध्यक्ष खा. ब्रिजभूषणसिंग यांच्यावर लैगिंक अत्याचाराचे आरोपानंतर केल्यानंतर सुरू झालेल्या कुस्तीपटूंच्या आंदोलनामध्ये विनेश ही अग्रस्थानी होती. त्याचाच फटका तिला या ऑलिंम्पिक स्पर्धेत बसल्याचं विरोधक बोलू लागले.
दरम्यान, या स्पर्धेतून बाद झाल्यावर विनेशने कुस्ती खेळातीन निवृत्ती घेत राजकारणात प्रवेश केला. लोकसभा निवडणूक 2024 मध्ये ती काँग्रेसच्या तिकीटावर खासदारपदी निवडून आली.
