इंजिनिअरिंग डिप्लोमा नंतर परदेशात जाऊ शकतो का?

आपण दहावीनंतर कुठलाही इंजिनिअरींग डिप्लोमा करू शकतो. काही बारावीनंतर पण डिप्लोमाला प्रवेश घेतात. जर आपण बारावीनंतरचे पर्याय आणि डिप्लोमानंतरचे पर्याय यांची जर तुलना केली तर डिप्लोमा विद्यार्थ्यांना कमी पर्याय दिसतात. डिप्लोमाला खूप चांगले गुण असतील तरच एखाद्या उच्च दर्जाच्या अभियांत्रिकी महाविद्यालयात प्रवेश मिळू शकतो. कारण उपलब्ध असलेल्या जागांमध्ये बारावीनंतरच्या विद्यार्थ्यांना जास्त प्राधान्य असते. सगळ्याच मुलांना सर्वोत्तम गुण मिळणे मुष्कील आहे. याला उत्तम पर्याय अमेरिकेतील शिक्षण निश्चितपणे ठरू शकतो.

ट्रान्सफर स्टुडण्टचं 1 वर्ष माफ

आपल्या इथे डिप्लोमा केला की पदवीच्या थेट दुसऱ्या वर्षाला प्रवेश मिळतो. डिप्लोमा केलेल्या विद्यार्थ्यांना अमेरिकेत दुसऱ्या वर्षाला प्रवेश मिळतोच शिवाय अजूनही काही विषय माफ केले जाऊ शकतात. याला क्रेडीट ट्रान्स्फर असे म्हणतात. आणि हे विद्यार्थ्यांना ट्रान्सफर स्टुडण्ट म्हणून ओळखले जातात. दहावीनंतर डिप्लोमा केला असेल तर आणि जर तुम्हाला तीनही वर्षाला मिळून जर चांगले मार्क्स असतील तर अमेरिकन युनिव्हर्सिटी कमीत कमी एक वर्ष माफ करतात. अर्थात प्रत्येक विषयातील गुण पाहिले जातात. ज्यांनी बारावीनंतर डिप्लोमाला प्रवेश घेतलेला आहे. जास्त फायदा ह्या प्रकारच्या विद्यार्थ्यांना होतो. त्यांना जवळपास 2 ते 3 वर्षे माफ केली जाऊ शकतात.

डिप्लोमाला कमी गुण मिळवणाऱ्यांना फायद्याचे

युनिव्हर्सिटी ला प्रवेश घेताना बारावीनंतरचे विद्यार्थी फ्रेशमन म्हणून अर्ज भरतात. डिप्लोमाला कमी गुण मिळालेल्या विद्यार्थ्यांनी हा पर्याय निवडायला हरकत नाही. यात फरक एवढाच पडतो की थेट दुसऱ्या वर्षाला प्रवेश मिळत नाही तर प्रथम वर्षापासून सुरुवात करावी लागते. यात एक फायदा असा होऊ शकतो की बरेचसे विषय डिप्लोमाला आधीच शिकल्यामुळे अभ्यासक्रम परिचयाचा असतो. त्यामुळे तो शिकण्यास सोपा जातो. एवढेच नव्हे तर अमेरिकन युनिव्हर्सिटीत क्रेडिट सिस्टम असल्याने एकाच वेळी जास्तीत जास्त सोपे विषय निवडून किमान 6 महिने ते 1 वर्ष वाचवता यायला हरकत नसते. ही लवचिकता आहे.

कमी स्कॉलरशीप

स्कॉलरशिपबद्दल विचार केला तर बारावीनंतरच्या विद्यार्थ्यांना (फ्रेशमन) जेवढी स्कॉलरशिपपेक्षा मिळते त्यापेक्षा थोडी कमी डिप्लोमा (ट्रान्स्फर) विद्यार्थ्यांना मिळते. फ्रेशमन विद्यार्थ्यांपेक्षा ट्रान्स्फर विद्यार्थी कमी विषय शिकत असल्याने स्कॉलरशिपदेखील कमी दिली जाते. डिप्लोमाला बऱ्यापैकी गुण मिळवूनदेखील अगदी चांगल्या महाविद्यालयात प्रवेश मिळणे कठीण असते. कारण जागाच मुळात कमी असतात. त्यासाठी अमेरिकेला जाणे हा एक उत्तम पर्याय ठरू शकतो.

डिप्लोमाच्या विद्यार्थ्यांनी नियोजन कसे करावे?

साधारणत: जून किंवा ऑक्टोबर मधे SAT आणि TOEFLची परीक्षा दिलेली उत्तम. त्यानंतर वेगवेगळ्या युनिव्हर्सिटी मधे अर्ज भरून मग मार्च-एप्रिल-मे च्या आसपास डिसिजन येतात. त्यानंतर व्हिसा मिळवून ऑगस्टमध्ये अमेरिकेला जाता येईल. डिप्लोमाला असताना उत्तम प्रोजेक्ट केला असेल तर तो रिसर्च असिस्टंटशिप मिळवून देण्यास मदत करू शकतो.