1788 मध्ये यूएस राज्यघटनेच्या मंजुरीनंतर एका वर्षानंतर 1789 मध्ये अमेरिकेची पहिली निवडणूक पार पडली. ज्यामध्ये जॉर्ज वॉशिंग्टन सर्वमताने अध्यक्ष म्हणून निवडले गेले होते. यावेळी कनेक्टिकट, डेलावेअर, जॉर्जिया, मेरीलँड, मॅसॅच्युसेट्स, न्यू हॅम्पशायर, न्यू जर्सी, पेनसिल्व्हेनिया, साउथ कॅरोलिना आणि व्हर्जिनिया या 10 राज्यांतील फक्त 69 मतदारांनी अध्यक्षपदासाठी मतदान केले होते.
13 सप्टेंबर 1788 रोजी काँग्रेसने पारित केलेल्या निवडणूक अध्यादेशात, राज्यांनी 7 जानेवारी 1789 रोजी अध्यक्षपदाच्या मतदारांची निवड करणे अनिवार्य केले.
काँग्रेसने अध्यक्षपदाच्या मतदानासाठी 4 फेब्रुवारी 1789 ही तारीख ठरवली होती. मात्र, अध्यक्षपदाच्या या निवडणुकीत सर्वच राज्यांनी भाग घेतला नाही. उदाहरणार्थ, नॉर्थ कॅरोलिना आणि ऱ्होड आयलंडने तोपर्यंत यूएस राज्यघटनेला मान्यता दिलेली नव्हती.
तर, न्यूयॉर्कने अंतर्गत वादामुळे निवडणूक कायदा पास केला नव्हता आणि मतदार निवडण्याची 7 जानेवारीची अंतिम मुदत चुकली. त्यामुळे शेवटी 10 राज्यांतील फक्त 69 मतदारांनी 4 फेब्रुवारी 1789 रोजी मतदान केले.
जॉर्ज वॉशिंग्टन, जॉन ॲडम्स, जॉन हॅनकॉक, जॉन मिल्टन आणि जॉर्ज क्लिंटन हे त्यावेळेस अध्यक्षपदासाठीचे उमेदवार होते. खरंतर, त्यावेळी अध्यक्ष निवडण्यास खूपच सोपे होते. प्रत्येक मतदार हा दोन मते देऊ शकत होता. एक अध्यक्ष आणि एक उपाध्यक्षाकरता. ज्याला सर्वात जास्त मते मिळतील तो अध्यक्ष होईल, तर दुसऱ्या क्रमांकावर सर्वाधिक मते मिळविणारा उपाध्यक्ष असेल असं ठरवण्यात आलं होतं. त्यानंतर निकाल काँग्रेसकडे पाठवून मग ते यूएस सिनेटर्स आणि प्रतिनिधींसमोर मोजले जात असत.
अध्यक्ष पदाच्या पहिल्या निवडणुकीच्यावेळी जॉर्ज वॉशिंग्टन हे संघीय सैन्याचे कमांडर-इन-चीफ म्हणून काम करत होते. ते अमेरिकेतील लोकांचे एक राष्ट्रीय आदर्श होते. त्यामुळेच त्यांना सर्वाधिक मते मिळतील असं अपेक्षित होते. पण त्यांनी अध्यक्षपदासाठी आपली उमेदवारी जाहीरच केली नव्हती. ना प्रचार केला होता, ना भाषण दिले होते. वॉशिंग्टनने असेही म्हटले की, जर त्यांना निवडले गेले, तर ते हे पद स्वीकारतील का याबद्दल त्यांनाच शंका होती.
त्याचा परिणाम काय झाला?
4 मार्च 1789 रोजी काँग्रेसकडे लोकांचे कामकाज चालवण्यासाठी पुरेसा कोरम नव्हता. त्यामुळे नंतर मतपत्रिकांची मोजणी करण्यासाठी काँग्रेसने 6 एप्रिल 1789 रोजी पुन्हा बैठक घेतली. या मतमोजणी नंतर वॉशिंग्टन, 69 मतांसह, युनायटेड स्टेट्सचे पहिले अध्यक्ष म्हणून एकमताने निवडले गेले. तर, जॉन ॲडम्स 34 मतांसह दुसऱ्या क्रमांकावर आले आणि अशा प्रकारे ते उपाध्यक्ष झाले.
वॉशिंग्टन यांना काँग्रेसच्या सचिवाने देशातील सर्वोच्च पदावर नेमणूक झाल्याच सांगितल्यावर, त्यांनी मतदारांचे आभार मानले आणि पदाचा स्वीकार केला. 30 एप्रिल 1789 रोजी न्यूयॉर्क शहरातील फेडरल हॉलमध्ये त्यांनी स्थानिक मॅसोनिक लॉजमधून उधार घेतलेल्या बायबलवर शपथ घेतली आणि अशा प्रकारे वॉशिंग्टन हे अमेरिकेचे पहिले मुख्य कार्यकारी अधिकारी बनले.
त्यानंतर ते दुसऱ्या कार्यकाळासाठीही सर्वमान्य मतांनी निवडले गेले आणि एडम्स उपाध्यक्ष म्हणून पुन्हा काम करत होते.
वॉशिंग्टनला तिसऱ्या कार्यकाळासाठी निवडले जाऊ शकले असते, पण त्यांनी आपल्या सहकारी राजकारण्यांसाठी आणि देशवासियांसाठी एक आदर्श ठेवला आणि सर्वोच्च पदावरून ते बाहेर पडले.
