पालघर जिल्ह्यातलं विरारमधील आगाशी म्हणजे ‘पोहा भुजिंग’ हे एक समीकरणचं आहे. कांदा-पोहे, बटाटे-पोहे, मटार-पोहे, नागपूरी तर्रीवाले पोहे इतकचं काय तर कोळंबी-पोहे, सोडे-पोहे, सुकट-पोहेही तुम्ही ऐकले असतील. पण पोहे आणि चिकन! भलतंच काय? पोहा भुजिंग हा असा पदार्थ आहे, जो तुम्हाला कुठल्या हॉटेलमध्ये मिळणार नाही. विरारमध्येही काही ठराविक गावांमध्येच पोहा भुजिंगची केंद्र आहेत. घरातही हा प्रकार क्वचितच बनवला जातो. काही ठराविक कुटुंबच हा पदार्थ तयार करतात.
पोह्यांसोबत भाजलेलं चिकन आणि बटाटे
पोह्यांमध्ये चिकन ही कल्पनाच काही जणांना विचित्र वाटू शकते. पण चांगलं खुरपूस भाजलेलं चिकन, बटाटा आणि गरम मसाल्याची फोडणी असलेल्या रश्श्यात कालवलेले पोहे तुम्ही जर का एकदा खाल्लेत, तर तुम्ही याच्या प्रेमात पडलाच म्हणून समजा. चिकन, बटाट्याचा स्मोकी फ्लेवर आणि स्थानिक चविच्या रश्श्यातील पोह्यांचा प्रत्येक घास खाताना, तुमच्या चेहऱ्यावर अनोखी तृप्तता पसरत जाते. यात मसाल्यांचा भरमसाठ मारा किंवा तिखटजाळ धूरही नाही, पण चव मात्र अप्रतिम आहे.
मराठी शब्द ‘भाजणे’ यावरुन या पदार्थाला ‘भुजिंग’ असं नाव पडलं आहे. हा पदार्थ कसा कुठे, कोणी पहिल्यांदा बनवला याची गोष्ट ही रंजक आहे.
भुजिंगचा जन्म कसा झाला ?
विरारमधल्या आगाशी गावातल्या बाबू हरी गावड यांनी हा पदार्थ पहिल्यांदा बनवला होता. गावड यांनी आपल्या मित्रांसाठी खास ताडीसोबत खाण्यासाठी हा पदार्थ बनवला होता. (ताड या झाडापासून मिळणाऱ्या रसाला ताडी म्हणतात.) त्यानंतर वारंवार त्यांचे मित्र आणि नातलगांकडून भूजिंगची मागणी होऊ लागली. पदार्थ बनवण्याची पद्धत, त्यासाठी वापरला जाणारा मसाला यामध्ये वेगळेपणा होता.
पुढे बाबू गावड यांनी या पदार्थाचा व्यवसाय करायचं ठरवलं आणि नऊ वर्षानंतर म्हणजे 1949 साली त्यांनी आगाशी इथंच आगाशी भुजिंग सेंटर (ABC) सुरू केलं. त्याचा मुलगा सुधाकर गावड यांनी सुद्धा हा व्यवसाय पुढे सुरु ठेवला. आज त्यांची तिसरी पिढी हे सेंटर आता चालवत आहे.
आज नालासोपारा, वसई आणि विरारमध्येही काही ठिकाणी भुजिंगची सेंटर्स सुरू केलेली आहेत. पण चवीच्या बाबतीत ‘आगाशी भुजिंग सेंटर’ने आपलं वेगळेपण जपून ठेवलं आहे.
चिकनसह मटणाचंही भुजिंग
चिकन भुजिंग या पदार्थाची निर्मिती करणाऱ्या गावड कुटुंबियांनी त्यांच्या व्यवसायात काळानुसार बदल केले आहेत. आता केवळ चिकनचंच नाही तर, मटणाचंही भुजिंग ते तयार करतात. लोकांच्या मागणीनुसार स्पेशल, बोनलेस भुजिंगसुद्धा ते करून देतात. हे भूजिंग किलोप्रमाणं विकलं जातं. कमीतकमी अर्ध्या किलोपर्यंतचं भुजिंग मिळतं.
कसं बनवतात भुजिंग?
भुजिंग बनवताना चिकन हे पूर्ण साफ धुवून घ्यायचं. त्यानंतर चिकन आणि बटाट्याला मीठ, हळद, जिरं आणि धने पावडर लावून बाजूला ठेवायचं.
तासाभरानंतर चिकन आणि बटाट्याचे तुकडे सळईत घालून निखाऱ्यांवर चांगल्याप्रकारे भाजून घ्यायचे. भाजताना ते जळणार नाही याची काळजी घ्यावी. साधारण दहा मिनिटं भाजायचं.
त्यानंतर ते थंड करुन घ्यायचं. थंड झाल्यानंतर कढईमध्ये तेलावर पोहे, थोडी हळद, मीठ आणि चवीनुसार गरम मसाले टाकून त्यामध्ये भाजलेलं चिकन आणि बटाटा चांगल्याप्रकारे मिक्स करुन घ्यायचं, की झालं तुमचं भुजिंग तयार.
सकाळचा नाश्ता, दुपारचं जेवण किंवा रात्रीचं जेवण कधीही खा, भुजिंग आवडणारचं. पण घरी करायच्या आधी जमलं तर, आगाशीत येऊन तिथलं ओरिजिनल भुजिंग नक्की खा.
